Antolojiya Dengbejan 3

Di derbarê pênaseya dengbêjiyê û deşifrekirina kilaman de bi reheti dikarim bibêjim ku amadekarên antolojiyê gotin ji me re nehiştine. Ji nû ve xwendin û dahûrandina kilaman dikeve ser piyê me kesên xwedi qelem. Dibe ku ji bona girseyeke mezin kilamên dengbêjiyê tenê kilam/muzik bin lê em kesên xwedi qelem nikarin bi çavê kilamê li kilam/kelamê mêze bikin. Êdi hukmê aşê pişaftina xwebixwe li dar e! Çêyiya ku iro em dikarin li xwe û paşivanên Kurd bikin berhevkirin û jihevveçirandina hikayet metafor peyv û deqên di edebiyata devki de ne. Dengbêj Huseyno dibêje: "Terz û meqama Reso lihevanina Şakiro û dengê min!" Wek ku gorbihuşt ji gotiye bawer im taybetmendiya Huseyno ya heri berbiçav dengê wi yê bişewat û bilind e. Qey tu dibê di qirika Huseyno de ne têlên deng lê tendûrek dişixule û peyv bi nalenal û zarezarê xwe jê diavêjin der! Huseyno kirasê dengbêjiya xwe ji lorinên jinan biriye. Bi awaza xwe ya bilind û bi form û qalibê vegotina jinan re terzeki nû yê ku texlidkirina wi zehmet e afirandiye.