Bibliyogarfyaya Kırmancki (Zazaki) 1963 - 2017)

Ziwan bingeyê estbiyayişê yew mileti yo ke az ra az neql beno. O tena wasitayê komunikasyon û dayiş-girewtişi niyo, eslê xo de wasitayêk aktif yê şekildayiş û xeliqnayişê kamiya ferdki û komelki yo. Fonksiyonê ziwani, hem hetê ferdki hem zi hetê komelki ra zaf muhim ê. Ziwan, miyanê cuya komeli de herikiyeno û beno hemparê çarenuştişê komeli. Kirmancki (zazaki) zi biya parçeyê qederê ma û çi heyf ke şertanê averşiyayene ra mehrum menda. Semedo ke kurdki nêbiya wayirê statuyê fermi, ne sazgehê ma yê musnayiş û averberdişê ziwani viraziyayê ne zi arşivxaneyê ma. Helbet na rewşe ziwan û kulturê kurdan ser o tesiro zaf negatif kerdo. Bitaybeti xebata ziwan, folklor, edebiyat û nuştişi, goreyê lehçeyanê ma yê binan kirmancki de hina berey dest pêkerdo. Ewro pêseriya kirmancki ya nuşteki ra behskerdişê ma, sayeyê çend merdimanê dilsozan û zehmetkêşan mumkun beno.