Dewres

Waxtêde beno nêbeno, zu padisa beno. Nû padisa hirê teni domanê xo estê. Rozê başqê sûke ra pasawo bin yeno beno meymanê ni pasay. Kerwan yeno. Kerwan yeno tabi pers keno milet vano: - İta ma nişkime to meyman kime. Vano “Pasayê ma esto so çê pasayê ma, û to belki meyman kero.” Sono uza. Sono uza saraya hênêne virasta ke fekê mêriki açix maneno, pasawo ke amo başqê dugele ra. Efendim beno sodir tabi waxto ke indi şêro, beno raye ci ra vano: - Hey wax hey! Na saraya to ci rê çi layiq o, çi noksan o? Altin bilbilê xo noksan o. Nika keşkê na saraya to de zu altin bilbilê to bibine, niya dewamli to rê biwano. Pasa vano: - Nê bira altin bilbil ez koti ra biyari, kam de esto, koti esto, senê dugele de esto, çitur yeno?