Deyirane Qerebegan Ü Siwani Ser O

Folklor seba heme miletan kerraya bingeyên a. Eke a kerra cayê xo şedeynaye nêbo, ser o çiyêk zi awan nêbeno. Miletê ke serdest ê heme çiyê inan bi ûsul qeyd û tesnif biyo. La seba miletanê bindestan ma nêeşkenê eyni çiyi vaji. Bi taybeti seba miletê ke hem bindest û hem zi heme çiyê inan qedexe biyo, payramendişê inan, neqilbiyayişê kulturê inan zehmetêko pil o. Eke dest nêerziyo ci, verba zemani vindi beno şino. Bi nê şiûri 2013 de mi dest bi xebata deyiranê ma û 2014 de zi meseleyanê Cimê Aşikan kerdbi. Hetèk ra ez kasetanê Cimê Aşikan ser o xebitiyayêne hetêk ra zi mi kasetê verên yê deyiran sax kerdêne. Axir yê Cimê Aşikan ra hewt hikayeyi Weşanxaneyê Roşna ra sey kitab neşr bi. Û nê deyiran ra “Zerenci” û “Lawko”, her yew bi varyantêk Newepel de weşaniyabi. Sebebê tercihkerdişê min yê kasetan no bi ke mi waşt bimojna ke tayê “hunermendan”ê neweyan seni kultur texrib kerdo. Çiyêko bin zi o bi ke medyaya sosyale de tayê merdiman goreyê xo çiyêk bestine deyiranê ma wa û ser o yew hikaye pêardêne. Coka mi waşt ez deyirbazanê verênan ra deyiran bigoşdari û bi hikayeya inan binusi.