Ken Parker - Lily u Neçirvan

Ken Parker Lehengeki xêzeromani ye ku niviskar Giancarlo Berardi û xêzker Ivo Milazzo ew afirandiye. Kesayeti û rûdêma Ken Parker feyza xwe ji Robert Redford ê serlehengê filma Jeremiah Johnson a derhênerê navdar Sydney Pollack werdigire. Kesê ku cara yekem Ken Parker dixwine, serê pêşin di bin bandora behremendiya Berardi ya di warê vebêjiya realist a sinemayi de û vehûnandina diyalogên wi yên ciwan de dimine ku di vi wari de ew ne kêmi derhênerên mezin e. Piştre ji dibe hijmetkarê wê xêza pir şêweyi ya ku ji serê firça Milazzo veder tê, ku karakter û mekanan di gel hemû hestên wan bi awayeki ew çend ciwan vediguhêzine. Gava ku xwiner kitêbeke Ken Parker diqedine, bi qasi balkêşiya çirokê û hostetiya xêzan, pê dihise ku dibe şeydayê vi anti lehengi ji ku tê vegotin. Baş e, ija ki ye gelo ev Ken Parker? Ken Parker gerokeki tenê û kubar e ku baweriyê bi nirxên gerdûni û aştiyê tine, û heta ku jê tê hewl dide ku xwe dûr bixe ji jingeha tije tundrewi ya li dorûberê xwe. Ew xwe weke keseki wezifedar an ji rizgarker nabine, lê belê, ew çend ji hestiyar û mêrxas e ku nikare xwe li hemberi neheqiyên ku li dorûberê wi rû didin ker bike. Ji bo Ken ti giyanewerek ne di ser yê din re ye, ew naşibe lehengên nêrane yên ku em pê dizanin ji cureyê westernê, ew yeki xwende, bi meraq û di şayişa hebûna xwe de ye. Li hemberi jinan bi şewqet û dilsoz e. Di serdemeke ku çekên otomatik lê bi kar bûn, sedema bijartina wi ya tivingeke yeklûleyi xwe disiparte wê xweşbiniya wi ya ku eger rojekê mecbûri nêçirê bimaya, da ku şanseki duyem bidaya wê giyanewera ku ji wê guleberdana wi ya tenê rizgar bûbe. Ji bo ku jiyana xwe berdewam bike, ji bili nêçirvaniyê, rêberiya artêşê ji dike. Ji ber vê yekê, xwiner ji bi Ken Parker re dibe şahidê qetliam û asimilasyona artêşê ya li çermesoran. Di vê rewşê de ji Ken Parker wê sekna xwe ya exlaqi ya ku em jê hêvi dikin, dubare nişan dide.