Koyi Biye Xezal

Bingeyê şiiranê Doxani otantik o, ziwanê xo nazik û nerm o, sey Ahmet Arifi yo. Çekuyanê xo zerri ra vano, derg nêkeno, mordemi nêqefilneno. Teyr û turi, dar û kemeri, nanê pepûgi, gizeri heni weş revsir keno ke, mordem a linge xo wertê xozayi de vineno. Vengê çemi êno gosanê to, suzga vayi dana rûyê to ro, boya zembuli êna pirnikanê to. Wexto ke qalê dewrê Kirmanciye û itiqatê Kirmanciye keno, xafil de dewrêsê pêyayi bi heqibeyanê xo dormeyê to de peyda benê. Min û Mutlu Cani piya na dosya amade kerde, Mutlu Cani pêro şiiri redakte kerdi. Karê ma ke qediya Doxani destûr da mi û nameyê kitabi ki mi na pira “Koyi Biyê Xezal”. Ez heni guman kena ke, no viraşte (eser) edebiyatê ma Kirmancan de cayê xo berz û payidar bo. Qenterê Kirmanciye de bivêro. Doxani gavare çarna hêgayê ma ser, hêgayê ma kerdo kewi (zergûn), royê ma kerdo şên. Weş û war bo. Mikail Aslan