Menewşi

Cam buxê helmê aye ra bibi sey perdeyêk. Destê xo derg kerd buxê cami ser ra bêçikê xo giran-giran fetilnay. Bux de şeklê yew estore xêze kerd. Çimê xo paday û a xeyal kerde. Estore heme sipi biye. Sey vewre, sey hewranê hamnani sipi biye. Tena çareyê aye beş bi, beşêde siya. A çargami vazdayêne. Ereqê aye binê tije deberiqiyayêne. Helmê aye riyê xo de his kerd. Qirpayişê zerri heşna. Nişka ra hewri gurray. Çimê xo akerdi û ewniyaye asmêni ra. Asmên bibi tingûtari. Buxê cami giran-giran pak kerd. Şeklê estore zi giran-giran vindi bi. Tena bijiyê estore mend. Biluski bajari ser o şewle da. Her ca yew viste de roşti bi. Dima anci tari bi. Lerze. Destê xo sêneyê xo ser o ardi pêser. Vileyê xo çewt kerd. Sereyê xo nabi pencera ra. Cam serdin bi…