Pepuk

Feqir berbeno, qureno, nata yeno bota sono, bêçare maneno. Niyadano ke mixara de hunde gilê derjêni roşti asena. Sono kineno, kineno cawo ke roşti yena, uza xêlê keno hira, pira niyadano, cawode heni rindek vêneno ke pêro bax û baxçe wo, çiçeg o, gul û gulistan o, her cayê xo pêro kesk o. Tekneno sono o baxço rindek de vejino. Nat û dot de niyadano ke o baxçe pêro pirrê morûn o. Mori yenê dormeyê ro ci cênê, benê leyê Sahê Morû. Sahê Morû text û payê xo ser o ronisto, nur û cemalê xo heni ke rindek o, çimê feqiri a rindiya dey ra manenê. Sareyê xo isan o, zobina her cayê xo mori yê. Sahê Morû vano: – Ti koti ra ama ita? Mi sima isanû ra zaf zerar diyo. Ti êndi mi rê meyman a, hardê dina nêsona. Meterse, ez qarisê to nêkeno, to ra towa nivano.