Roportaje Zazaki

No roportaj nêzdiyê hirê serri yo ke mi dest de yo. Mi verê zi Dat Eskeri (Ap Eskeri) reyde nê behsi ser o roportaj kerdbi labelê kasetê ê roportaji çi heyf ke xirabe vejiyabi û moralê mi zi zaf herimiyabi. Belki tikê tembeliyê ra tikê zi na bêmoraliyê ra destê mi nêşiynê nê roportajê diyine. Hetani ke hostayanê mi Espari û Malmisaniji çend rey ard virê mi. Dat Eskeri, dewanê Pirani ra Hopi ra yo. Wextê jenosidê Dêrsimi de uca eskerê dewlete biyo. O bi xo emrê xo weş nêzano, yani derheqê emrê ey de qetiyet çin o. Goreyê tayê hesaban se serre yo û goreyê tayêne zi se û panc serre. No xusus de, çiyo ke o qeti zano no yo ke o di rey şiyo esker. Lajê ey o pil Wis derheqê emrê piyê xo de wina vano: “Ez 1938 di ameyo dinya. Piy mi şiyo esker, ez şeş aşmi şiyayişê ey ra pey biyo. Piy pêrdê mi İsê Guli wexto ki şiyo Yemen eskerey, piy mi zi şeş aşmi şiyayişê ey ra pey biyo... Piy mi wexto ki zewejiyawo hiris serre biyo...”