Serek

Şew a, şewa tari û zulmat a. Çim çimi nêvineno. Herd û asmên zê domanê sêwi jibeno, bermeno. Kam çi zano belki herd û asmên çin o, belki qet teba çin o. Asmên orte de bi di leteyi. Çiyê veciya orte. Ne est bi ne çin bi. Qet nêmendibi tebayi. Ya ki teba nêmendibi ey; çiyo ke serê herdi de, qet yew nêmendibi ey. Ya ki o nêmendibi tebayi. O çiyo ke serê herdi de, o bi feqet qet yewi hurenda ey nêgirotêne. O pêro bi; çi ke serê herdi de est bi, pêro o bi. Ne riyê xo est bi ne şeklê xo. O goşt ra, goni ra nêbi. O candar nêbi la bêcan ki nêbi. Ne germin bi ne serdin, ne derg bi ne kilm, ne zaf bi ne şenik, ne tern bi ne huşk, ne kokim bi ne genc, ne gilorkin bi ne duz, ne feteliyêne ne hurenda xo de vindetêne. Yê ey, zê qulê di-lingi destê xo, lingê xo, sereyê xo, çimê xo, goşê xo, qelbê xo çin bi. Nêmendibi qulê di lingi.