Veng ü Hesreta Herde Dewreşi (Nuşteye Weçiniteyi)

Heyatê mi de kirmancki her tim wayirê cayêde zaf taybeti yo. Ez şikin vajine ke hendê (hondê) ey çiyêde bini dilgermiye mi nêda û nêdano. Beguman no halêde zaf normal o. Çi ke raya verêne mi bi nê ziwani vengê maya xo hesno, aye lorik û şaniki mi rê bi ey vatê, bi ey mi de yareniye kerda, mi ra “sêmênê mi” vato, bi ey mi ra hêrs biya, perno ra mi ser. Xoza (tebiet) û komelo ke ez tede biyane pil mi bi nê ziwani nas kerdê û bi ey, inan de têkiliye na ro. Qisa derg mekeri; ez bi nê ziwani estane, bi nê ziwani cuya xo ramen. O ke bimro, ez ki miren. Fiziki nêbo ki hetê ruhi ra miren, têkiliya min a sosyale mirena. Ez nika xo bi xo fikirin; gelo seba ke ziwanê min ê dayike, no ziwano şirino delal vindi nêbo, mi çiqas xo verdo? Nê derheqi de kêmi û şaşiyê mi estê, eke estê çik ê? Seke mi sewbina (zovina) cayan de ki qal kerdo, bi kirmacki nuştoxiya mi dormeyê 1977i de dest pêkena.